Internet Explorer hallka e dobët në sulmet kundër Google

Washington, 16 janar - Microsoft ka pranuar se Internet Exploreri i saj ishte hallka e dobët në sulmet e fundit ndaj sistemeve të Google të kryera nga Kina. Kompania në një blog të postuar njoftoi se një dobësi e shfletuesit lejon hakerët të drejtojnë programet nga larg në kompjuterët e infektuar. Pas sulmit, Google kërcënoi se do t’i japë fund veprimtarisë së saj në Kinë.
Microsoft ka lëshuar udhëzime paraprake për të zbutur problemin dhe po punon në freskimin e softuerit.

Deri tani, Microsoft “nuk ka vërejtur ndikim të gjerë te konsumatorët, vetëm disa sulme të kufizuara duke shfrytëzuar Internet Explorer 6”. “Duke u bazuar në hulumtimet tona, kemi përcaktuar se Internet Exploreri ishte një prej vektorëve të përdorur në sulmet e sofistikuara kundër Google dhe ndoshta rrjeteve të korporatave tjera”, njoftoi drejtori i Microsoftit për siguri Mike Reavey.