Google Nexus One

Google Nexus One është një prej modeleve më të fundit Android, ndoshta edhe më i miri dhe me të drejtë Google e quan “super celularë” sepse është një shembull i asaj se çfarë mund të bëni me Android.

Celulari ka një procesor të jashtëzakonshëm: 1 GHz Qualcomm Snapdragon (i njëjti procesor që gjendet tek HTC HD2). Gjithashtu ka 512 MB RAM edh ROM. Pastaj ka një ekran AMOLED të ndjeshëm në prekje (capacitive touchscreen) me madhësi 3.7 inç dhe me një rezolucion prej 480 x 800 piksela. Kamera në të është 5 megapiksel dhe gjithashtu përmban blic LED (kjo kamerë ka mundësi të incizojë edhe video në format MPEG-4 me mundësi të ngarkimit në YouTube përmes një klikimi, gjë që do të jetë jashtëzakonisht thjeshtë përmes Wi-Fi).

Trackball-i ka një LED me shumë ngjyra për paralajmërime të ndryshme dhe natyrisht Nexus One ka një kompas, GPS, GSM-Radio (AWS dhe euro rrjete 2100 Mhz), Stereo Bluetooth, port 3.5 mm për dëgjuese, dy mikrofona për “shuarje aktive të zhurmës”, sensor të ndriçimit dhe afërsisë, si dhe në bord ka gjithashtu një akselerometër. Në anën e memories qëndron një port për kartela microSD që mund të zgjerohet deri në 32GB (celulari ju ofrohet në pako me një kartelë 4GB). Ka një bateri 1400 mAh, e cila premton 5 orë punë në shfletim 3G dhe 7 orë punë në biseda 3G. Çmimi i tij do të jetë 530 dollarë.

Dizajni i tij është bërë nga Google dhe HTC ndërsa vetë Nexus One funksionon përmes versionit të ri të Android, Android 2.1.